7 wenke vir ’n goedkoop, romantiese Valentynsaand tuis

– Versorg deur Mariette Snyman. Foto Pexels

Wenk #1

Gaan koop sommer vandag nog daardie Valentynskaartjie en -geskenk vir jou geliefde. Wat verkies jy – wyn, sjokolade of ’n ander ’n tradisionele geskenk, of iets heel oorspronkliks wat by jou begroting pas? Dink aan die verloop van jou geliefde se dag: het hy iets nodig vir daardie eerste koppie koffie of tee, vir sy oggendstort, of vir sy gimsessie? Is daar iets wat sy rit werk toe of sy werksdag kan opkikker? Kan jy dink aan ’n produk wat inskakel by sy gunstelingmanier om sy vrye tyd te bestee? Miskien iets wat hy vir ’n stokperdjie kan gebruik, of iets wat hom kan help om sy lewe beter te organiseer (soos sy versameling goeters in die motorhuis)? Is daar iets wat hy gereeld by jou of by iemand anders leen? Of iets wat hom lekker laat lag?

Wenk #2

Nou is dit jou beurt. Hoe kan jy op jou beste lyk? Hoor gerus by jou vriendin of dogter of jy iets sensueels kan leen om op Valentynsdag aan te trek; dalk kan dit ’n ruiltransaksie wees. Of gaan kyk met ’n vars oog na die klere in jou kas.

Lees ook: Die mooiste tuin-idees vir Valentynsdag!

Wenk #3

Beplan ’n besondere Valentynsviering – tuis! Hoe kan jy die huis in ’n kindervrye sone omskep? Kan die kroos die aand by oupa en ouma oorslaap, of dalk by vriende? (Volgende jaar kan jy weer julle vriende se kinders huisves.)

Wenk #4

Besluit of jy self gaan kook, en of ’n kitsete/kitskos vir twee teen ’n redelike prys jou beter sal pas. Dit hoef nie ingewikkeld te wees nie – indien dit in jou geliefde se smaak val, is kaas, biltong of koue vleis, olywe, agurkies, piekeluitjies, peppadews, brood, vrugte en van jul ander gunstelinglekkernye ’n praktiese opsie. Dek ’n lieflike tafel met blomme uit jou of ’n vriendin se tuin, of raak kreatief met loof of met iets in jou huis wat as versiering ingespan kan word. En moenie die kerslig vergeet nie!

Dink uit die boks oor die vertrekke in jul huis

Wenk #5

Dink uit die boks oor die vertrekke in jul huis. Waar gaan julle die aandjie deurbring? Kan jy dalk die kos in die slaapkamer bedien, en dan na ’n ander vertrek versit? Hoe kan jy dit mooi en gesellig maak?

Lees ook: Hoe om die beste orgasme en seksuele bevrediging op enige ouderdom te kry

Wenk #6

Om atmosfeer te skep, is gegeurde kerse ’n wenner. Dit kos nie veel nie, ruik heerlik en skep ’n intieme atmosfeer. Dis egter verstandig om nie met vuur te speel nie – sit die kerse op ’n oppervlak waar hulle nie maklik omgestamp kan word nie, op ’n veilige afstand van die gordyne.