4 redes hoekom jy jou kind teen masels moet vaksineer
Vaksineer tog maar
Bang om jou kind teen masels te vaksineer? Lees hier:
Masels is van die aansteeklikste siektes op aarde.
Die virus versprei in die lug. Jy kan dit inasem as iemand met masels naby jou hoes of nies. En nog erger: die virus oorleef tot twee uur lank in ’n vertrek waar iemand met masels was.
Lees ook: Vaksinering – moet jy of moet jy nie?
1. Daar is geen medikasie nie
As jou kind eers siek is, is hy op sy eie. Ons het al vergeet hoe ernstig masels is. Voor 1960 het sowat 2,6 miljoen kinders per jaar daaraan gesterf. Daarby veroorsaak dit té dikwels breinskade, blindheid en doofheid.
Lees ook: Heroorweeg jy die vaksien teen masels? Dink weer …
2. Ons kan nie op tropimmuniteit staatmaak nie
As 95% van kinders geïmmuniseer is, is die kans op masels so klein dat dit vir alle praktiese doeleindes nie gebeur nie.
Maar dit bestaan nie in Suid-Afrika nie, om twee redes: afgeleë gebiede sonder klinieke; en klinieke sonder vaksien. Ons haal dus nie die 95% vaksineringskoers nie, en behou aktiewe kernbronne van die maselvirus. In 2017 was daar drie uitbrake met 6 256 siek kinders.
Lees ook: Die 5 inentings wat jy as volwassenes moet kry
3. Vals versus goeie navorsing
Andrew Wakefield, die man wat “bewys” het dat masels outisme veroorsaak, het sy teorie op net twaalf geselekteerde pasiënte gegrond. Sy ondersoek is later uitgegooi.
Daarteenoor het dosyne opvolgondersoeke op ’n paar miljoen kinders géén verband tussen die MMR-vaksien en outisme gekry nie.
Die jongste is in Maart 2019 gepubliseer, op 657 461 Deense kinders. Wakefield se navorsing het ons ten beste bedag gemaak op veilige vaksiene maar dit bly ’n leuen.
4. Antivaksinering is ’n identiteitsimbool
Dit is een ding om nie toegang tot die maselvaksien te hê nie, en ’n ander saak om aktief daarteen te kies. ’n Groot groep van ons is eerder onseker omdat ons verwarrende boodskappe hoor. As jy die beste vir jou kinders wil hê en nie seker is of jy jou dokter of Jessica Biel en Jim Carrey moet glo nie, raadpleeg dan die beste bronne, soos erkende navorsing op PubMed, Health Canada en ons eie NICD, eerder as dié mense wat op Andrew Wakefield se twaalf gevalle as hul bron staatmaak. Dit is so dat antivaksinering trendy onder sekere groepe jong ma’s is. Lees eerder na, as wat ’n klein, eensydige groep ten koste van jou kind vir jou dikteer.
