2 dinge wat jy moet weet oor grensposte, jou motor en versekering deur Anet Schoeman. Hooffoto: pixabay
Beplan jy ’n vakansie in ’n buurland of selfs hoër op in Afrika? Onthou, daar is verskeie motorversekeringsimplikasies sodra jy die landsgrense oorsteek.
1 Vind uit: Wat dek jou versekering?
Bel eerstens jou versekeringsmaatskappy en stel vas watter van jou voordele geld as jy die grens oorsteek. Afhangend van jou polis, kan dit volle of min dekking wees. In die meeste gevalle kan jy deur ’n klein bybetaling bykomende versekering vir daardie tyd kry. In sommige gevalle kan jou versekeraar vereis dat jy besonderhede oor jou eindbestemming gee.
#rrWenk: Onthou, as jy nie die korrekte inligting gee nie, kan jou versekeraar ’n eis weier as jy ’n ongeluk het of jou voertuig gesteel word.
pixabay
2 Weet wat die wette is rakende jou kar
Sedert einde 2016 het die regering aktief sekere wette, wat vereis dat motoriste registrasiedokumente vir hul voertuie het, by grensposte begin toepas. Hierdie wette geld alle voertuie, dié wat nog gefinansier word, sowel as dié wat reeds afbetaal is. Die oogmerk is om te keer dat gesteelde voertuie uit die land geneem word.
Bel jou bank vir ’n gesertifiseerde afskrif van jou registrasiedokumente, of as die voertuig afbetaal is, laat ’n afskrif by ’n polisiestasie sertifiseer.
pixabay
Lees Meer
