So is ‘Paula’ se hare gedoen

As blondine was Paula se rol ’n bietjie van ’n “airhead”. Ons moes elke twee weke haar hare weer blond kleur om te keer dat dit uitgroei. Al die gebleik het die toestand van haar hare beïnvloed en ons het besluit om eerder haar hare donkerder te maak; nader aan haar natuurlike kleur.

Paula se karakter het meer volwasse en gesofistikeerd geraak en die nuwe haarstyl pas hierby. Die manier waarop haar hare nou gekleur is, bruin met die effense ligter punte (sombré word die styl genoem), is ook meer “trendy” en Paula is immers ’n styl-ikoon.

Ons het eers baie bruin ingesit en ’n paar blonde strepies en toe haar hare in ’n bob gesny.
Twee weke later het ek dit sombré gemaak (’n meer natuurlike weergawe van die ombré-voorkoms waar die hare steeds donker bo is en ligter onder, maar die voorkoms is meer natuurlik en minder opsigtelik).

Daar is gebruik gemaak van die “flashlight”-metode waar mense sommige dele rondom die gesig ligter verf; sodat dit net lyk of dit natuurlik lig vang.

Op die oomblik doen ek balayage (waar ek ligstrepies vryhand aanverf om dit te laat lyk of dit natuurlik lig vang) sodat haar wortels en punte se kleur bymekaar kom.

As Paula “fabulous” voel, is haar hare gekrul. ’n Groot “barrel” krultang word gebruik en dan word haar hare lekker uitgeskud.

Vir spesiale geleenthede neem ons dit op.

As sy en Altie baklei of wanneer sy net broos voel, blaas ons dit net mooi sag.