Pollopesketariërs, fleksitariërs, entomofage ... wie eet wat?

Pollopesketariërs, fleksitariërs, entomofage … wie eet wat? deur Salomé Delport

Hier is ’n maklike gids om te verstaan wie wat eet – en wat hulle nie eet nie

Vegetariërs

Vegetariërs eet geen vleis nie aangesien dit die neem van ’n lewe behels. Hulle eet nie die vleis van diere, voëls (hoender, volstruis, eend) of vis nie. Hulle eet wel diereprodukte, soos eiers, melk en jogurt.

Lees ook: Kan vegetariërs ooit genoeg proteïen kry?

Veganiste

Veganiste eet nie vleis nie, om dieselfde rede. Hulle eet ook nie produkte van diere nie omdat dit diere uitbuit. Hulle sny ook kos soos eiers, melk, kaas en jogurt uit. En hulle dra ook nie leer, wol of enige ander materiale wat van diere afkomstig is nie.

Lees ook: Help, ’n veganis kom by my eet! Wat nou?

Pollotariërs

Pollotariërs eet net die vleis van voëls, soos hoender en eend. Hulle eet verder net groente, vrugte, en sekere dierprodukte soos eiers en melk.

Pesketariërs

Pesketariërs eet net vis – hulle eet nie ander tipes vleis nie. Dus is vleis van voëls uit. Hulle eet wel soms ander dierprodukte, soos eiers en melk.

Pollopesketariërs

Pollopesketariërs eet vis en hoender maar geen dierevleis nie. Hulle sal soms ander dierprodukte ook eet, soos eiers, melk en kaas.

Fleksitariërs

Fleksitariërs eet net vrugte en groente maar sal soms vis, vleis, hoender of insekte eet. Hulle eet dus per geleentheid vleis, maar sal nie elke dag of met elke ete hierdie produkte eet nie.

Lees ook: 11 maklike happies vir laer cholesterol