Stap-vir-stap naelkuns

Kelly Chang van Ma Cherie Nails is in Taiwan gebore en op 11jarige ouderdom het sy na Suid-Afrika verhuis. Sy het in die skoonheidsbedryf begin werk en daarna in naels gespesialiseer voordat sy besluit het om terug Taiwan toe te gaan om haar kennis uit te brei. In Japan is naelkuns veels groter as in Suid-Afrika en die resultate is verstomend. Sy spesialiseer in jel-naels omdat dit langer as gewone naellak hou.

Sy het vir ons prettige piesangs geverf! Hier is die stappe om jou eie piesang-vorms te skep.

Stap 1

Haal alle naellak van jou naels af. Verwyder dooie vel van die naelbed deur dit saggies terug te druk of met ’n naelborsel te skrop.

Stap 2

Verf ’n basis-laag om jou naels te beskerm en die politoer langer te laat hou.

Stap 3

Verf naels afwisselend geel en wit. Herhaal om ’n mooi soliede kleur te verkry.

Stap 4

Op die naels wat wit is: vat ’n verfkwassie en verf geel halfmaan-vormpies. Jy kan ’n paar per nael maak of net een in die
middel.

Stap 5

Gebruik nou die kwassie met swart verf en teken liggies die buitelyne van die piesang rondom die geel vorms. Trek ook ’n strepie in die middel van bo tot onder om die piesangs ’n driedimensionele vorm te gee.

Stap 6

Vir naels wat net een piesang op het, kan jy met die swart verf woorde skryf, of swart kolletjies om die rand van die nael maak.

Stap 7

Maak ’n dik kolletjie met deurskynende naelpolitoer of naelgom. Kry ’n spesiale naeljuweel-plakkertjie of -blinkertjie en plak een in die middel aan die bokant van elke geel nael (die naels wat nie piesangs op het nie.)