2012 ghd Style-A-Thon
Die 2012 ghd style-A-Thon is soortgelyk aan KANSA se Shavathon waar lede van die publiek die kans gegun word om hul hare af te skeer om geld vir kankerbewustheid in te samel. Met die ghd style-A-thon kry vrywilligers die geleentheid om hul hare deur professionele haarstiliste te laat stileer. Die style-A-thon word vanjaar vir die tweede keer aangebied en alle geld gaan aan KANSA.
Waar en wanneer vind die ghd style-A-thon plaas?
Saterdag 27 Oktober, en Sondag 28 Oktober by winkelsentrums in Johannesburg, Durban en Kaapstad.
Cancer.vive
Cancer.vive is ’n kankerbewustheid- en opvoedkundige inisiatief wat deel vorm van die organisasie PLWC (People Living With Cancer). Die hoofdoel van hierdie organisasie is om jaarliks 30 000 mense deur verskeie veldtogte en projekte te bereik. Een van hierdie veldtogte is ’n motorfietsrit wat vrywilligers spesifiek vir liefdadigheid aanpak. Die veldtog fokus daarop om veral mense in landelike gemeenskappe en klein dorpies van die sogenaamde “skaam” kankers (bors, ovariaal, testikulêr, prostaat en kolorektaal) bewus te maak.
’n Skokkende feit is dat meer mense wêreldwyd aan kanker sterf as aan HIV/vigs, TB en malaria tesaam. Hoewel nie alle kankers beheer kan word nie, kan 30% kankers voorkom of behandel word indien dit vroegtydig gediagnoseer word. Dit is onder andere die boodskap wat Cancer.vive aan diegene wil oordra wat oningelig is oor die siekte.
Die motorfietsrit word deur individue ondersteun wat kanker oorleef het en vanjaar sal meer as vyftig mense die rit na plekke soos Soweto, Witbank, Sabie, Nelspruit en Mantongomane aanpak.
Die Cancer.vive motorfietsrit vind plaas tussen 22 en 28 September 2012.
Foto’s van verlede jaar se Cancer.vive motorfietsrit
